சக்தி தொலைக்காட்சியில் அறிமுகமாகி தற்போது வசந்தம் டி.வி.யின் நிகழ்ச்சி தயாரிப்பாளராகவும் தொகுப்பாளராகவும் வலம் வந்து கொண்டிருக்கும் அர்ச்சனாவின் நேர்காணல்
நேர்காணல்:
எஸ்.ரோஷன்
பாடசாலை காலங்களில் நான் இலக்கியத்தில் பெரும் நாட்டம் கொண்டவள். சிறுகதைகள், கட்டுரைகள், கவிதைகள் எழுதி வந்தேன். அப்படியிருந்தும் தற்போது ஒரு எழுத்தாளராக வருவதற்கு ஒரு சந்தர்ப்பம் இல்லாது போவிட்டது. இருந்தும் ஒரு அறிவிப்பாளராக புகழ்பெற்றது மகிழ்ச்சியளிக்கிறது என்கிறார் சக்தி தொலைக்காட்சியில் அறிமுகமாகி தற்போது வசந்தம் டி.வி.யின் நிகழ்ச்சி தயாரிப்பாளராகவும் தொகுப்பாளராகவும் வலம் வந்து கொண்டிருக்கும் அர்ச்சனா.
இந்த வார உதயசூரியனில் உங்களுடன்...
ஹா வணக்கம். நான் குடும்பத்தில் ஒரே ஒரு செல்லப்பிள்ளை. என் சொந்த இடம் யாழ்ப்பாணம். பாடசாலை காலத்தில் பரதநாட்டியம், நாடகம், இலக்கியம், விளையாட்டு போன்றவற்றில் ஈடுபட்டு பல வெற்றிகளை பெற்றிருக்கிறேன். உயர் கல்வியை கொழும்பில் படித்துக்கொண்டு இருக்கும் போது சக்தி தொலைக்காட்சியில் நிகழ்ச்சி தொகுப்பாளர் தேவை என்ற விளம்பரம் பார்த்து விண்ணப்பித்தேன். எனது முதல் நிகழ்ச்சியான ஆனந்த இல்லம் நிகழ்ச்சி 2008 ஆம் ஆண்டுக்கான சிறந்த சஞ்சிகை நிகழ்ச்சிக்கான தேசிய விருதைப் பெற்றது.
பின்னர் சக்தி தொலைக்காட்சியில் பெண்மணிக்காக, சந்திப்போமா, சக்தி சட், குட்மோனிங் சிறிலங்கா, பிரியமான தோழியே ஆகிய நிகழ்ச்சிகளை ரசிகர்களின் பெரும் வரவேற்புக்கு மத்தியில் தொகுத்து வழங்கினேன்.
தற்போது வசந்தம் தொலைக்காட்சியில் நிகழ்ச்சி தயாரிப்பாளராக இருப்பதுடன் தலைவாசல் என்ற காலை நிகழ்ச்சியையும் தொகுத்து வழங்கி வருகின்றேன்.
* அறிவிப்புத்துறையைச் சேர்ந்தவர்கள் இப்படித்தான் இருக்கவேண்டுமென்று எல்லோரும் சொல்வார்கள். ஆனால் நீங்கள் சொல்லுங்கள் ஒரு அறிவிப்பாளர் எப்படி இருக்கக்கூடாது?
அறிவிப்பாளர் தொலைக்காட்சியில் தன்னை எல்லாம் தெரிந்த விற்பனர் என நினைத்து தனது கருத்துகளை மக்களுக்கு திணிக்கக் கூடாது. ஏன் என்றால் மக்களுள் ஒருவராக நேயர்களுடன் சினேக பூர்வ கருத்தாடலை மேற்கோள்ள வேண்டும். மற்றவர்களின் மாதிரிகளைப் பின்பற்றாமல் தனித்துவமான பாணியில் நிகழ்ச்சிகளை தொகுத்து வழங்குவதன் மூலம் மக்கள் மத்தியில் தனக்கென்று ஒரு இடத்தை பிடிக்கலாம்.
*இலங்கையில்/ இந்தியாவில் உள்ள அறிவிப்பாளர்களில் உங்களைக் கவர்ந்தவர் யார்?
வானொலியிலும் தொலைக்காட்சியிலும் எனக்குப் பிடித்த அறிவிப்பாளர் பி.எச்.அப்துல் ஹமீட் அவர்கள்தான். இவரின் குரல் வளமும் தமிழ் உச்சரிப்பும் நேர்த்தியான நிகழ்ச்சித் தொகுப்பும் பிரமிக்கத்தக்கது.
*நீங்கள் விரும்பிப் பார்க்கும் தொலைக்காட்சி எது?
விஜ டி.வி.தான் நான் விரும்பிப் பார்ப்பது. காரணம் விஜ டி.வி.யின் நிகழ்ச்சிகள் பிரமாண்டமாகவும் சுவாரஷ்யமாகவும் சமுகத்துக்கு தேவையான நல்ல கருத்துகளை முன்வைக்கும் நிகழ்ச்சிகளை வழங்குகின்றார்கள். அதில் நீயா நானா என்ற நிகழ்ச்சி ரொம்பப் பிடிக்கும். அதன் தொகுப்பாளர் கோபிநாத் ஒரு முற்போக்கு சிந்தனையாளர், பத்திரிகையாளர் அதுமட்டுமல்ல நல்ல எழுத்தாளரும் கூட, அதற்குச் சான்றாக ப்ளீஸ் இந்த புத்தகத்தை வாங்காதீங்க, தெருவெல்லாம் தேவதைகள், நேர் நேர் தேமா ஆகிய புத்தகங்களை எழுதி உள்ளார்.
*உங்களுடைய ரோல் மொடல் யார்?
எனது ரோல் மொடல் என் அம்மா தான். அம்மாவைப் போல், தன்னம்பிக்கையை துணையாகக் கொண்டு வாழ்க்கையில் சாதித்தவரை இது வரைக்கும் நேராக நான் கண்டதில்லை.
*உங்களுக்குப் பிடித்த சினிமா நடிகர், நடிகை யார்?
*சமீபத்தில் நீங்கள் பார்த்த படம் எது?
சமீபத்தில் நான் பார்த்து, ரசித்து, வியந்த படம் நான் ஈ தாங்க... நம் சிந்தனைக்கு அப்பாற்பட்ட கதை அம்சம் கொண்ட படம். நடிகர்களின் நடிப்பு, இசை, பாடல் எல்லாமே சிறப்பு. சாதாரணமாக ஈயை அடித்து கொல்பவர்களும் இந்த படத்தைப் பார்த்து ஒரு ஈக்காக அழுதார்கள்.
*வாழ்வில் மறக்க நினைப்பது எது?
வாழ்வில் மறக்க நினைப்பது போரும், அது தந்த மனக் காயங்களையும் கண்ணீரையும் எனது வாழ்வில் மறக்க நினைக்கின்றேன்...
*உங்களுடைய வாழ்க்கையில் மறக்க முடியாத சம்பவம் ?
என் தா மண்ணான யாழ்ப்பாணத்தில் இருந்து தொகுத்து வழங்கிய சந்திப்போமா நிகழ்ச்சி. மற்றையது சந்திப்போமா நிகழ்ச்சிக்காக பூண்டுலோயாவில் உள்ள பாடசாலை ஒன்றுக்கு சென்றிருந்த போது அந்த பாடசாலையின் இடைவேளை நேரத்திற்கான மணி அடித்ததும் மாணவர்கள் அனைவரும் என்னிடம் ஓடி வந்து சுற்றிவளைத்துக்கொண்டு ஓட்டோகிராப் கேட்டது என்றும் மறக்க முடியாது.
*உங்களுடைய பொழுதுபோக்கு என்ன?
எனது பொழுதுபோக்கு புகைப்படங்கள் எடுப்பது, மற்றும் இணையத்தளத்தில் சமையல் குறிப்புகளை பார்த்து சமைத்து பார்ப்பது.
* திருமணம் எப்போது...?
வீட்டில் பார்த்துக்கொண்டிருக்காங்க... மிக விரைவில் டும் டும் டும் தாங்க...
*உங்களுடைய பிளஸ், மைனஸ் என்ன?
பிளஸ் முதல் சந்திப்பிலேயே என்னை எல்லோரும் ஸ்னேகிப்பது.
மைனஸ் முன் கோபம். அதை விட கொடுமை
அந்த கோபமும் கொஞ்ச நேரம் தான்.
*உங்களுக்கு பிடித்த சாப்பாடு?
அம்மா சமைக்கிற சாப்பாடு எது என்றாலும் எனக்கு ரொம்பப் பிடிக்கும்.
*அடிக்கடி எந்தப் பொருளை மறப்பீர்கள்?
நான் அடிக்கடி மறக்கும் பொருள் என்றால் பேனை தாங்க. அது கிடைக்காட்டி யாரிடமாவது கேட்டுவாங்கி எழுத மாட்டேன். மீண்டும் ஒரு புதிய பேனையை வாங்கிடுவேன்.
*நீங்கள் படித்ததில் உங்களுக்கு பிடித்த விடயம்?
தன்னை முகமூடிகளுக்குப் பின்னால் ஒளிந்து கொள்கிற மனிதர்கள் தங்களையே தொலைத்து விடுவார்கள் என்ற ஒஷோவின் தெளிவான பார்வை எல்லோருக்கும் தெளிவைத் தரும். தத்துவங்கள் என்றாலே, அவை தளர்ந்து போனவர்களுக்குத்தான் என்கிற தவறான கருத்தைத் தகர்த்து, வாழ்வியலின் வலிமையே தத்துவம் என்கிற புதிய பார்வையோடு எதையும் அணுகிய ஒஷோவைப் பிடிக்கும்.
* நேயர்களுக்கு சொல்ல விரும்புவது?
போட்டியும் சவால்களும் நிறைந்ததுதான் ஊடகம். பெண்கள் ஊடகத்துறைக்கு வந்து பிரபல்யம் அடைவதை மட்டும் சாதனையாக எண்ணாமல், தனிப்பட்ட வாழ்விலும் சிறந்து நற்பெயருடன் வாழவேண்டும்.
